egradio.eg logo
egradio.eg ads
الرئيسية | الصحة العامة | أستشارات | عايز أرجع مصر بسبب تشقق الجلد اللي بيحصلي

عايز أرجع مصر بسبب تشقق الجلد اللي بيحصلي

بواسطة
حجم الخط: Decrease font Enlarge font
عايز أرجع مصر بسبب تشقق الجلد اللي بيحصلي عايز أرجع مصر بسبب تشقق الجلد اللي بيحصلي

لو سمحتوا ياجماعه ممكن تشوفولي حاجة تخلي جسمي طبيعي زي ما بيكون في مصر .

الحكاية :

أنا شاب عندي 25 سنة ، كنت في مصر أنسان عادي ، وجسمي طبيعي ، عادي زي أي واحد ، ولعدم وجود شغل في مصر فحبيت أسافر إلي الخارج ، وفعلاً حاولت ، وسافرت إلي السعودية .

المهم بئا أني بعد ماجيت هنا السعودية ، وبعد مرور حوالي شهرين بدء يحصل لجلد جسمي تغيرات ، ومنها أني لقيت جلدي عامل زي ما يكون جاف ، بمعني أني لما مثلاً أجي أميل أحس أن جسمي بيتشرخ ، أو أحب أجلس بردو أحس أن جلدي بيتشرح ، وحتي لو ضميت أيدي وفردتها أحس بردو بالتشرح ، وبصراحة بتعب نفسياً أوي لما جسمي بيبقه كده .

وعند التشطيف يادوب أحس بالراحة الجسدية لمدة عشر دقائق فقط ، الي هية لسة جسمي عليه مية ، أو رطب ، وبعد ما تنشف المية من على جسمي برجع أحس نفس الاحساس الي هو التشرح في الجلد ، وبخلع هدومي وأبص علي جسمي بلقيه مشرخ أو عمل زي خطوط كده (بس علي فكره مش بيخليني أهرش ولا حاجه) بس لو حبيت أهرش في جسمي بيتطلع مادة زي الدقيق ، فبصراحة تعبت أوي .

وأستحملت كتير لدرجة أني أستحملت مدة سنتين بس بصراحة كانو سنتين سود ، مع أني كشفت عند أكتر من دكتور ، واحد يقولي أنت بتفكر كتير .

والتاني يقولي جو السعودية مختلف عن جو مصر وهو ده الي عمل معاك كده عشان جسمك حساس شويه ، ويعطوني علاج مراهم وبرشام ، حتي عند المراهم وقت ما أحطها بس أحس أن جسمي بقا حلو ، وبعد مرور 20 دقيقة ألاقي جسمي بيبدء يشد تاني ويجف .

المهم استحملت السنتين بالعافية والله .

وقولت والله لروح مصر ومش هرجع تاني السعودية .

المهم لما روحت مصر وبعد مرور 7 أيام حسيت بأن جسمي بيرجع لطبيعته زي زمان ، وفعلاً رجع لطبيعته في المدة الي جلستها في مصر ، لدرجة أني كنت عايز أصوره عشان مكنتش مصدق أن ده جسمي الي كنت بشوفه في السعودية .

المهم ولصعوبة المعيشة في مصر ، مع أني حاولت بقدر الأمكان أني مسافرش ، بسبب جسمي ، لكن للأسف أطريت للسفر لصعوبه المعيشة في مصر .

وسافرت تاني ، وبعد مرور 15 يوم بالضبط بدء جسمي يرجع للي كان فيه تاني ، وبجد أنا أتشائمت من السعودية ، ومن الرياض ، بسبب الي بيحصل لجسمي ده .

وبجد ببقه مش عارف أشتغل ، ولا عارف أقعد ، ولا حتي ببقا عارف انام ، عشان وانا بتحرك بحس بتشقق في جسمي .

فياريت لو دكتور أبن حلال ومتخصص في أمراض الجلد وشاف الموضوع يحاول يشوف حل عشان أعرف أعيش في السعودية .

عشان مفيش بديل للعمل في مصر ، عشان حاولت كتير ومحصلش نصيب .

مع العلم أني أعمل محاسب ، يعني مش متعرض للجو أوي .

بجد أسف عشان طولت عليكم ، بس أعذروني بجد تعبان أوي من الي بيحصل لجسمي ده ، وياريت حد يلاقيلي حل في المشكلة دي ، وبجد أسف كمان مرة علي الأطاله .